بسم الله الرحمن الرحيم أهلا وسهلا من جديد في مدونة المتخرج سليمان

الحقيقة لي تقريبا شهرين مسافر وصار فيه أكشن وخبرة, أحس أن كل شهر ب 3 شهور, الحقيقة في يوم من الأيام بعد ما طلعت الدرجات وتأكدت أني متخرج!

أول شيء سويته قبل ابدأ أقدم كلمت الشباب كلهم اللي متخرج واللي متوظف أخذ الخبرات منهم وأطبقها في رحلتي للبحث عن الوظيفة

تعلمت منهم التالي

تحتاج تتعلم كيف تكتب إيميل بطريقة صحيحة

يكون عنوان الرسالة فيه اسمك وتخصصك والمكان اللي ناوي تشتغل فيه

ويكون فيه بريف فيه مقدمة بسيطة عنك أو أهم انجازاتك ومعدلك إذا كان عالي

حلو أنك تكتب عن الوظيفة اللي مقدم عليها والأحسن تتكلم عن الشركة شوي (عشان ما يطلع شكلك مقدم على بقالة!)

تحتاج تتعلم تسوي سيرة ذاتية

ذي بسوي لها بلوق خاص فيها اشرحها بالتفصيل وبذكر أهم النقاط الحين

الملخص يشوفونه بعين حاره

الأخطاء الإملائية عليها العين

المعدل اذا ما كان مرتفع شله

راجع وحسنها طول الوقت

تحتاج معارف توصلك لشركات (مو واسطة الواسطة تحط الشخص الغير مناسب في مكان اقوى منه) المعارف والتزكية اي انسان يحتاجها

ذي ال20 بالمية اللي راح تحقق لك 80 من النتيجة

صدقني على كثر ما فيها شعور الحين في فترة الشباب نبغى نكون لوحدنا ونسيطر على العالم على كثر ما تحتاج اللي حولك يساعدونك

كون انك متخرج ما يعني انك رهيب

يعني انك بالربع الخالي وتحتاج احد يرشدك

التقديم بالايميل غير فعال وراح اذكر ببوست جاي ليش

لينكد إن مهم يكون عندك صفحة

لا تحط عمرك

حط صورة رسمية لك

حط العنوان المدينة اللي فيها الشركة أو السعودية اذا ما عندك مشكلة تسكن بالخرخير

الشركات الكبيرة تقديم على الموقع

بعدها بديت اقدم على الايميل ارسل وأرسل وارسل ولا فيه رد لدرجة بديت اتسائل في نفسي

هل المشكلة فيني؟

هل احتاج أطور من مهاراتي؟

ووش يحتاجون الشركات اصلن؟

يمكن السي في مو مره كويسه؟

طيب المعدل؟

المدونة هي نتاج عدم الرد

بعد ما سويت سيرة ذاتية اغلب معلميني اجمعوا انها كويسه بس بقى التعديلات اللي يقول غير الأماكن ويذكر يقول هذا رأي شخصي ترا

بديت أرسل يوم يومين ثلاثة اوجعني راسي من البحث اللي ما يخلص قررت اسوي مدونة يكون فيها نتاج عملي وكأنها مجلد فيه الاشياء اللي حققتها بالجامعة

وبعدها تحولت الى مدونة لأني من قديم اتمنى اكتب لكم وأعطيكم الزبدة بمواضيع رهيبة مره

على العموم محد رد وحسيت ان الدنيا سكرت بوجهي

روحتي للرياض وصدمة كمية الشركات اللي هناك

بعد كم يوم وانا اعدل بالمدونة وأحسنها صار لي ظرف ورحت للرياض قلت فرصة مناسبة مره خل اقدم يدوي بيومين اقدر اشوف الوضع

وانصدمت بعدد الشركات اللي موجودة هناك,كنت ابحث بالانترنت واحصل كثير من الشركات هناك ولكن ما تصورت بهالعدد

قبلها بيوم سألت الشباب اللي هناك عن الشركات اللي يعرفونها وكان عندي تقريبا 8 شركات

رحت لأول وحده

السلام عليكم كيف الحال جاي من القصيم ادور وظيفة!

ماعندنا

طيب الله يطول عمرك وش فيه شركات قريبة من هنا لها نفس تخصصكم

^ على فكرة الطريقة ذي غلط لا تسوونها

تطلع لي 6 شركات جديدة,ويومها بالليل سويت بحث وكل مره تطلع لي شركات أكثر! ,وقلت دقيقة شوي المعلومات ذي تبي مراجعة شوي واحتاج ارجع وارجع ثانية الشركات ذي تحتاج شهر أو شهرين كل يوم أمرهم

^على فكرة الطريقة ذي مو مرة رهيبة في طرق أكثر كفاءة

التقديم اليدوي وش استفدت منه

الحقيقة استفدت من التقديم اليدوي درس ما شفته الا بعد كم اسبوع

اللي هو

لا تقدم يدوي

أمزح, التقديم اليدوي تدور حوله كثير من الشكوك هل هو كويس أو لا, لكن اللي استفدت منه من التقديم اليدوي علمني أن الرفض شيء عادي مرة والحياة تحتاج صملة بشكل رهيب.

شعوري اول ما وصلت للرياض

أول ما وصلت للرياض كان شعوري متضارب بين الحماس والخوف, الحماس بكمية الفرص اللي فيها وخوف أنك مغترب, البدايات دائما صعبة ومع الوقت تتحسن التجربة والمعارف تقوى الأهم أنك تصمل

ليش قررت اشتغل بالمبيعات وليش تحتاج تتعلم هالشيء؟

بعد فترة من الزمن وانا اتبحر في الشركات وصلني كم عرض وظيفي وصادف اني سمعت بودكاست تيم فيريس ئكر فيه عن أغلب رواد الأعمال بدؤا مبيعات, السبب اللي خلاني اتخذ هالقرار هو أن العروض اللي وصلتني ما تتناسب مع طبيعتي بشكل يجعلني انسان غير فعال في الحياة

قلت خل نترك التخصص ونكمل على اللي متعودين عليه ونفس النسق الاول

الان انا متدرب في شركة متخصصة في التسويق الرقمي اعمل فيها سيلز

السيلز راح يعطيك المهارة في الإقناع

بيعطيك قدرة على تحمل الرفض (وهذا بحد ذاته مهم مره ) لأنك في حياتك بيجيك رفض كثير بعد الجامعة

ومن هنا بدأت القصة قصة سليمان اللي يتدرب مبيعات